पुणे : जागतिक मराठी अकादमीतर्फे आयोजित करण्यात येणारे ‘शोध मराठी मनाचा’ हे पंधरावे जागतिक संमेलन एक ते तीन जानेवारी २०१८ या कालावधीत पुणे येथे होणार आहे. या संमेलनाचे अध्यक्षपद ऑस्ट्रेलिया येथील अभियंते आणि ऑस्ट्रेलियन सरकारने ऑर्डर ऑफ ऑस्ट्रेलिया या सर्वोच्च नागरी सन्मानाने गौरवलेले डॉ. विजय जोशी भूषवणार आहेत.
उद्योग क्षेत्रात वेगळा आदर्श निर्माण करून सुमारे ७० हजार जणांना रोजगार मिळवून देणारे भारत विकास ग्रुपचे (बीव्हीजी) संस्थापंक अध्यक्ष हणमंतराव गायकवाड हे या संमेलनाचे स्वागताध्यक्ष आहेत. ‘जगभरात विखुरलेल्या आणि उद्योग, व्यवसाय, विज्ञान, स्थापत्य, साहित्य, कला अशा विविध क्षेत्रात महत्त्वपूर्ण कामगिरी करणाऱ्या मराठी व्यक्तींना या संमेलनाच्या माध्यमातून एकत्र आणले जाणार आहे,’ अशी माहिती जागतिक मराठी अकादमीचे अध्यक्ष ज्येष्ठ कवी आणि वात्रटिकाकार रामदास फुटाणे आणि संमेलनाचे प्रमुख संयोजक सचिन ईटकर यांनी दिली.
संमेलनाच्या स्थळाची घोषणा लवकरच करण्यात येणार असून संमेलनाचे उद्घाटन केंद्रीय मंत्री नितीन गडकरी यांच्या हस्ते होणार आहे. या वेळी प्रमुख पाहुणे म्हणून माजी केंद्रीय मंत्री शरद पवार, मुख्यमंत्री देवेंद्र फडणवीस, केंद्रीय मंत्री प्रकाश जावडेकर उपस्थित राहणार आहेत. पालकमंत्री गिरीश बापट आणि महापौर मुक्ता टिळक हे संमेलनाचे मुख्य मार्गदर्शक आहेत.
१९९४ साली स्थापण्यात आलेल्या जागतिक मराठी अकादमीतर्फे २००४ सालापासून ‘शोध मराठी मनाचा’ हे जागतिक संमेलन भरवण्यात येत आहे. यावर्षी या संमेलनात युरोप, अमेरिका, मध्य अफ्रिका आणि आशिया खंडातील विविध क्षेत्रातील कर्तृत्ववान मराठी बांधव या सहभागी होणार असल्याचे फुटाणे आणि ईटकर यांनी सांगितले.
उद्घाटनाविषयी :दिवस : एक जानेवारी २०१८
वेळ : सायंकाळी चार वाजता
स्थळ : पुणे